47 ikastolatako milaka ikasleren botoei esker, euskarazko literaturaren eta ilustratzearen aldeko urte osoko lana ospatu zuten Zizur Nagusian.

Nafarroako Ikastolen Elkarteak JUUL 2026 sari-banaketa ekitaldia egin zuen atzo Zizur Nagusiko Kultur Etxean. Ikastoletako ikasleen boto gehien jaso zituzten euskal idazle eta ilustratzaileek euren aitortza jaso zuten bertan, irakurzaletasunaren sustapena eta euskal sorkuntza ardatz dituen egitasmo baten barruan. Ekitaldia Nafarroa Oinez antolatzen ari den ikastolarekin elkarlanean antolatu zen.

Aurtengo edizioak berriro erakutsi du JUUL egitasmoaren indarra. Duela 28 urte abiatu zenetik, Euskal Herriko 47 ikastolaren parte-hartzea lortu du, eta milaka ikasleren konpromisoa euskarazko irakurketarekin sustatzen jarraitzen du. Aurten, apirilaren 23ko bozketan, 14.817 boto eman ziren euskarazko liburuen kategorian eta 8.251 ilustratzaileen kategorian.

Ekitaldian izan ziren, besteak beste, Maite Mutuberria, Leire Bilbao, Nuria Figueras, Unai Elorriaga, Itxaso Martin, Nerea Loiola, Jasone Osoro, Jon Arretxe, Eider Eibar, Joseba Larratxe “Josevisky” eta Julen Ribas. Antolatzaileek bereziki eskertu zuten sortzaileen presentzia, ikasleen eta egileen arteko topagune bihurtu baitzen ekitaldia.

Janire Gracia Iñurritak, Nafarroako Ikastolen Elkarteko arduradun pedagogikoak, gogorarazi zuen JUUL ez dela sari-banaketa hutsa, ikastoletan urte osoan zehar egiten den irakurzaletasunaren sustapen-lanaren isla baizik. Azpimarratu zuenez, egitasmoaren helburua da ikasleen artean irakurzaletasuna sustatzea eta, aldi berean, sortzaile aktibo izatera bultzatzea.